SSRİ Xalq artisti Vladimir Etuşun yubiley gecəsi

İyunun 12-də Rus Dövlət Dram Teatrında SSRİ Xalq artisti, Rusiyanın Şukin adına Teatr Məktəbinin bədii rəhbəri Vladimir Etuşun 90 illik yubiley gecəsi keçirilib. Mərasimdə Azərbaycanın mədəniyyət və turizm naziri Əbülfəs Qarayev, Rusiyanın ölkəmizdəki səfiri Vladimir Doroxin, tanınmış incəsənət xadimləri iştirak ediblər.

Yubilyar tamaşaçılara öz həyatından maraqlı məqamları danışıb, monoloqlar səsləndirib. Vladimir Etuş əslən bakılı olan qadınla ailə həyatı qurduğunu, şəhərimiz haqqında ən xoş xatirələrə sahib olduğunu deyib: “Dünən axşama kimi xanımımla Bakını gəzmişik, heç hotelə qayıtmaq istəmirdik. Bura tez-tez gəlmədiyimə təəssüf edirəm”.

Gecənin sonunda isə Y.Vaxtanqov adına Akademik Dram Teatrının aktyorlarının ifasında “Liman” tamaşasından fraqmentlər ifa olunub.

Mədəniyyət.- 2013.- 14 iyun.- S. 5.